Osasun-zerbitzuak

Edozein arrazoi tarteko etxetik irteterik ez duten pertsonentzako zerbitzua da, analisia egiteko odolaren edo gernuaren lagina atera behar diotenean.
Erizain bat joango zaizu etxera bertara, lagina bildu eta erreferentziako laborategira eramateko, bertan azter dezaten.

Erizaintza osasun-zientzien ataletako bat da eta, ondorioz, unibertsitate-karrera bat. Gaixoen zaintzaz eta arretaz, laguntza-lanez, osasuna sustatzeaz eta gaixotasunak prebenitzeaz arduratzen da.

Zerbitzu honetan, profesionala pazientearen bizilekura joaten da, sendaketa baten bilakaera kontrolatzeko edota noizbehinka edo erregularki injektagarri bat ezartzeko, tentsioa hartzeko, glukosa-proba egiteko, zunda bat ezartzeko…

Etxez etxeko fisioterapia laguntza handia da mugitzerik ez duten edo mugikortasun mugatua duten pertsonentzat (berdin dio adinekoak izan ala ez) edota edozein arrazoi dela eta, etxetik irteterik ez duten pertsona guztientzat.
Adina edo desgaitasuna bada ezin mugitzeko arrazoia, pazientearen arrisku-faktoreak identifikatzeko eta aldatzeko prebentzio-laguntza handia ere bada etxez etxeko fisioterapia. Izan ere, jarrerak tratatuz, mugiezintasunaren ondorioz sortzen diren lesio garrantzitsuak prebenituko ditugu.
Mugikortasuna ekiditen duen arrazoia lesio fisikoa bada, fisioterapiak lesioa sendatzen lagunduko du.
Nolanahi ere, fisioterapeutak tratamendua egiteko behar den material guztia eramango du etxera, eta tratamendurik egokiena erabiliko du (masajeak, mugitzea, korronte elektrikoak, ultrasoinuak…), pertsona sendatzeko prozesuan emaitza onak lortzeko.

Atal honetan ibilbide profesional aitortua eta eskarmentu handia duten osasun-profesional tituludunak aurkituko ditugu, osasun-jarduera etxera bertara eraman dezaten.

Etxeko ospitalizazioa ohiko ospitalizazioaren ordezko aukera da: pazienteak ospitalean jaso litzakeen tratamendu eta arreta berdinak jasoko ditu kalitatean nahiz kantitatean, baina bere etxean egonik.
Honako hauek ditugu onurarik garrantzitsuenetako batzuk:
— Pazientearen ongizatea, intimitatea eta erosotasuna handiagoak dira, beraren ohiko ingurunean dagoelako.
— Ospitaletan gertatzen diren infekzioen arriskua murrizten da.
— Senideek gaixoaren zaintzan eta bilakaeran parte hartzen dute.
— Zentro klinikoak optimizatu egiten dira, eskura dauden baliabideen erabilera hobetu egiten delako.
Etxeako ospitalizazio-unitatean sartzeko, zenbait baldintza bete behar dira:
— Aurretiaz ospitaleratuta egon izana, edota pazientea artatzen duen ohiko sendagilearen ustez, unitate horretan egoteko aukera izatea.
— Gaixotasunaren bilakaerak halako unitatea batean tratatzeko aukera eskaintzea.
— Pazientea ados egotea.
— Unitate horren estaldura duen eremu batean bizitzea.
— Etxebizitza pazientearen eta gaixotasunaren beharrizanetara egokituta egotea.
— Familiak gaixoaren arretan parte hartzea.
Etxeko ospitalizazioa patologia jakin batzuetarako aproposa da. Adibidez:
— Patologia kronikoak (bihotzeko gutxiegitasuna, bronkopatia kronikoa…) dituzten pazienteentzat.
— Patologia akutuen (pneumonia baten, adibidez) jarraipena egiteko eta kortikoideen, antibiotikoen eta abarren bidezko tratamendua egiteko.
— Gaixotasun onkologikoetarako: sintomak kontrolatzeko, tratamenduen jarraipena egiteko, zaintza aringarriak eskaintzeko…
— Kirurgia osteko aldirako: ebakuntza jakin batzuk egin ondoko arreta jasotzeko (adibidez, ebakuntza osteko zaintzak eta zainketak egiteko, hala nola eskarak eta larruazaleko ultzerak tratatzeko).
— Aireztapen mekanikoa, zain barnetiko tratamenduak (zain barneko antibioterapia, nutrizio parenterala…) eta abar behar dituzten pazienteentzat.
— Prozedura teknikoak (hala nola transfusioak edo parazentesiak) behar dituzten patologietarako.
Etxeko ospitalizazio-unitatean sartu ondoren, pazienteak osasun-laguntzailearen bisita jasoko du, behar duen arreta eskaintzeko. Langileak berak eramango du beharrezko material guztia, seruma izan nahiz zaintzetarako materiala izan. Erizaintzako unibertsitate-diplomadunak, sendagileak edo biek agintzen dizkiete egin beharrekoak osasun-laguntzaileei.

Arrazoi bat edo beste dela osasun-zentroetara joaterik ez duten eta aldian aldiko sendagilearen kontrola behar duten gaixoen bilakaera ikusteko zerbitzua da.
Gaixotasun kronikoak (diabetesa, hipertentsio arteriala, arnas-gaixotasunak eta abar) dituzten pertsonak dira, egoera orokorra gainbegiratzea eta tratamendua kontrolatzea behar dutenak.

Orotariko gailuak erabiliz giza gorputzeko deformazioak zuzentzeko edo prebenitzeko erabiltzen den teknika da ortopedia.

Gailu ortopedikoei ortesiak esaten zaie, eta ez dira protesiekin nahasi behar (edozein arrazoi dela eta falta den gorputz-atala artifizialki ordezteko piezak dira protesiak). Trauma bat, gaixotasun bat edo orotariko patologiaren bat duten pertsonek jo behar izaten dute ortopedistarengana, salgai dauden produktuetakoren bat erostera. Horrela, osasun-arazoak konpondu edo, sikiera, murriztu egin ditzakete.

Atal honetan, eskarmentu handiko ortopedia ezagunak aurkituko dituzu, laguntza teknikoak eskatzen dituzten orotariko egoerak konpontzen laguntzeko.